a week ago

لیلۃ الرغائب،آرزوؤں کی شب

لیلۃ الرغائب،آرزوؤں کی شب

ماہ رجب کی پہلی شب جمعہ کو لیلۃ الرغائب کہا جاتا ہے جس کا مطلب ہے آرزوؤں کی شب۔یہ شب بہت زیادہ فضیلت کی حامل ہے اور اسکے کچھ خاص اعمال بھی ہیں۔

 

رسول خدا (صلی اللہ علیہ و آلہ) نے ماہ رجب کی فضیلت کو بیان کرتے ہوئے فرمایا: ماہ رجب کی پہلی شب جمعہ سے غافل نہ ہو کیونکہ فرشتوں نے اس رات کا نام ”لیلة الرغائب“ رکھا ہے۔

 

رسول خدا (صلی اللہ علیہ و آلہ) سے اس رات کے لیے ایک نماز نقل ہوئی ہے جس کے فضائل کے بارے رسول اللہ صلی اللہ علیہ و آلہ وسلم نے

 فرمایا: جو شخص اس نماز کو پڑھے گاخدا وند عالم اس کے تمام گناہوں کو بخش دے گا․․․ اور قیامت میں اپنے خاندان سے سات سو لوگوں کی شفاعت کرے گا اوراس کے مرنے کے بعد پہلی رات کو قبر میں خداوند عالم اس کے بدلے میں ایک خوبصورت ، نیک اور فصیح و گویا چہرہ کو اس کی طرف بھیجے گا وہ خوبصورت چہرہ اس سے کہے گا : ” اے میرے حبیب! تمہیں بشارت ہو کہ تمہیں ہر شدت و سختی سے نجات مل گئی“ وہ اس نورانی چہرہ سے پوچھے گا تم کون ہو؟ میں نے ابھی تک تم سے زیادہ خوبصورت چہرہ نہیں دیکھا ہے اور تم جیسی خوشبو آج تک میرے مشام میں نہیں آئی ہے۔وہ خوبصورت چہرہ جواب دے گا: اے میرے حبیب ! میں تمہاری اس نماز کا بدلا ہوں جس کو تم نے فلاں شہر، فلاں ماہ اور فلاں سال میں انجام دی تھی میں آج تمہارے پاس آئی ہوں تاکہ تمہارا حق ادا کروں اور تمہاری تنہائی میں تمہاری مونس و غمخوار رہوں، اور وحشت کو تم سے دور کروں، (اور ہمیشہ تمہارے پاس رہوں) اس وقت تک جب سب کو اٹھایاجائے گااور قیامت میں تمہارے سر پر سایہ فگن رہوں، خلاصہ یہ کہ کبھی بھی تم سے اس نیک کام کابدلہ ختم نہیں ہوگا.

 نماز کا طریقہ

اس با برکت نماز کا طریقہ  یہ ہے کہ ماہ رجب  کی پہلی جمعرات کو روزہ رکھیں اور جب شب جمعہ آجائے تو نماز مغرب و عشاء کے درمیان دو دو رکعت کرکے بارہ رکعت نماز پڑھیں، ہر رکعت میں سورہ حمد کے بعد تین مرتبہ سورہ قدر اور بارہ مرتبہ سورہ توحید  پڑھیں، نماز سے فارغ ہونے کے بعد ستر مرتبہ کہیں: 

اَللَّھُمَّ صَلِّ عَلٰی مُحَمَّدٍ النبیِ الاُمِّیِ وَ عَلیٰ آلِہٰ 

پھر سجدے میں جا کر ستر مرتبہ کہے:سُبُّوْحُ، قُدُّوْسُ، رَبُ الْمَلائِکَۃِ وَ الرُّوْح سجدے سے سر اٹھا کر ستر مرتبہ کہے:رَبِّ اغْفَرْ وَارْحَمْ وَتَجَاوَزْ عَمَّا تَعْلَمُ أَنَّکَ اَنْتَ العَلِیُّ الْاَعْظَمُ

 پھر سجدے میں جائے اور ستر مرتبہ کہے: سُبُّوْحُ، قُدُّوْسُ، رَبُ الْمَلائِکَۃِ وَ الرُّوْحِ

پھر اپنی حاجت طلب کرے ،انشاء اللہ پوری ہوگی۔

 

مفاتیح الجنان۔

:وسائل الشیعة، ج 8، ص 98، باب 6.

 

سید ابن طاوس فی الاقبال الاعمال 632۔

 

بحار الانوار جلد 95 ۔ صفحہ 396۔ باب 106

 

کتاب المراقبات حاج میرزا جواد ملکی تبریزی

 

کفعمی فی بلد الامین 

 

ابن جوذی فی الکتاب الموضوعات